Euskal Herriko musikan urrats garrantzitsu bat eman berri dute: jaio da Euskal Herriko Orkestra Barrokoa, gurean hutsune nabarmena betetzera datorren proiektu berria. Orkestra barroko bat ez da ohiko orkestra sinfoniko bat: garaiko instrumentuekin —edo haien kopiekin— eta interpretazio historikoaren irizpideekin lan egiten duen taldea da. Tripazko hariak, arku bereziak, tiorbak, klabezinak, viola da gambak… eta, noski, barrokoaren bihotza den baxu kontinuoa. Proiektuak, gainera, badu dimentsio pedagogiko sendo bat: Akademia ere sortu dute, gazte musikari profesionalentzako ate berriak zabaltzeko asmoz, sareak ehuntzeko eta hemen bertan lan egiteko aukerak indartzeko. Eta aurkezpen ofizial gisa, bi hitzordu berezi: otsailaren 26an Bilboko Arriagan eta 28an Donostiako Kursaalen, “Maskarada” izeneko kontzertua eskainiko dute. Barroko garaiko gorteetako maskaradak eta Zuberoako maskarada herrikoia uztartuko dituzte, musika, dantza eta antzerkia elkarrizketan jarriz. Gaur gurean Miren Zeberio dugu Euskal Herriko Orkestra Barrokoaren sortzaileetakoa.
Deskargatu hemen.
