Jatekoak ibilbide luze eta bihurria egiten du gorputzean: ahoan behera, esofagoa, sabela, duodenoa, heste meharra, heste lodia, ondestea eta uzkia zeharkatzen ditu. Azken zatiaz berba egin dugu Oier Gorosabel fisioterapeutarekin. Kakagura sentsazioa igartzen hasiko gara eta uzkiko esfinterra erabilita (borondatez kontrolatzeko ahalmena baitugu), tarte batez, libratzeko gogoari eutsi ahal izango diogu. Leku eroso eta lasaia aurkitutakoan, uzkia erlaxatzea nahikoa izan beharko litzateke heste lodi beherakari osoaren hustuketa erreflexua pizteko; 60 bat zentimetroko txorongo lodia erruteko, alegia. Idorreriaz jotako irakurleen aurpegiak ikus ditzaket: oi amets ukiezina! Izan ere, ohitura txarren eta osasun arazo anitzen ondorioz, jende askok –askok, gero- kaka egiteko arazoak ditu. Arazootako askok komunean uzkia ez erlaxatzearekin dute zerikusia. Pertsona batzuek, berriz, hainbat egun pasa ditzakete kaka egin barik. Idorreriaren jatorria askotarikoa izan daiteke, eta bakoitzak badu bere tratamendua.
Deskargatu hemen.
