Oso bisita atsegina eduki dugu aste honetan Soinugelan: John Bolduan estatubatuar musikaria etorri zaigu. Missouriko folk kantari hau txikitan abiatu zen musikaren arloan eta geroztik munduan barrena ibili da bere gitarra jotzen. Hiru urte eta erdi daramatza Bilbon eta euskaraz polito moldatzen da (saioan bertan euskara apur bat egin digu). Berak esan digunez, kolaborazio lan ugari egiten du zenbait musikarekin, baina, halaber, bere bakarkako lana ere badauka. Irratsaioan Can´t Fight Fire With A Match bere lehen lanaren zenbait kanta entzun ditugu, baina baita orain prestatzen ari den disko berriaren lagin esanguratsu bat ere. Oso elkarrizketa-emanaldi atsegina gertatu zaigu John Bolduan lagunarena.