Hainbat kolektibok bultzaturik eta babesturik, maiatzaren 20, 21 eta 22an Txirrinka izeneko ekimena izango da. Asteburu horretan Arabatik, Bizkaitik, Lapurditik eta Nafarroa Garaitik lau txirrindulari tropel handi aterako dira eta denak Bergaran bildu, bertan baita AHT delakoaren lotunea. Bertara bilduko diren herritar guztiek lurrari kalte egiten dioten egitasmo erraldoi guztien kontra protesta egin nahi dute, Abiadura Handiko Trena horren adibide argienetako bat izanik. Martxarekin batera, lurrari egin zaizkion eta oraindik egin nahi zaizkion kalteen mapa ere egina dute (urtegiak, zentral nuklearrak, meategiak, erraustegiak, …). Gaur egungo borrokak ez ezik, lehen izandakoak ere ageri dira mapa horretan, elkarrekin hartuta, larregizko egitasmo funsgabe horiei galga eman dakiekeela gogora dezagun.
