Bizkaia Irratia eta Bilbo Hiria Irratiko lagunok elkarlanean Korrikaren Bilboko ibilbidearen jarraipena zuzenean egingo dugu ostegunean. 17:00ak aldera Zorrotzako auzokideek hartuko dute lekukoa, eta ia bost orduz Bilboko auzo guztietatik ibili ostean Elorrietatik aterako da Korrika Sondikara bidea hartuz. Zuzeneko saio berezian konexio eta elkarrizketak izango ditugu, ibilbidearen berri eman, eta Korrikan parte hartzen dutenen ahotsak eta irudiak jasoko ditugu. Korrikalariak, euskaltzaleak, lekuko eramaileak, kazetariak eta euskara izango dira protagonista. Kontakizuna, Bilbo Hiria irratiko Xabier Monasterio eta Bizkaia Irratiko Ainhoa Larrazabalek egingo dute. Kaletik konexioak eginez Ane Zabala, Alfre Elgezabal, Jabi Zabala eta Isabel Isazelaia ibiliko dira. Gainera hainbat ahots batuko dira saiora: Oihana Bartra, Naroa Gaintza, Lutxo Egia, Ugaitz Alegria, Niko Cuenca, Iurdana Casuso eta Mikel Martinez, besteak beste. Korrikaren saio berezia arratsaldeko 18:30etik 20:00etara izango da entzungai Bilbo Hiria irratiko sintonian eta Bizkaia Irratiko sintonian.
