Atzo arratsaldean aukera izan genuen Kubako eta Euskal Herriko kantaerak alderatzeko, emakumezko eta ahots-armoniak erabiltzen kantatzen duten bi talde buruz buru ikusita. Aire ahizpak Durangoko Kupela tabernan izan ziren kantu-bazkarian, Durangoko azokan euren Bidexka diskoa aurkeztu ostean. Bazkalostean hara non agertu ziren karibeko euren ahizpa kubatarrak, Danielis eta Danieuris, Las dos D edo, euskarara ekarrita, BiDeak bikotea. Batzuek zein besteek euskarazko kanta sorta ederra oparitu ziguten, une hunkigarri eta barregarriak tartean. Ondoren, Danielis eta Danieurisekin solasteko aukera izan genuen.
