Bilbo Hiriaren webguneari itxura aldaketa egin diogu azken asteotan, lehen baino eduki gehiago eta hobeto erakusteko. Azalean nabaritzen da aldaketa gehienbat, bertan hedabide handi baten itxurarekin erakusten baititugu albiste ugari. Batez ere, pantaila handietan igartzen da hori, baina, normala denez, smartphoneetako pantailetan egokituta ikusiko dugu webgunea. Hasteko, azken albisteak topatuko ditugu. Ondoren, tokiko hedabidea garenez gero, Bilbori eman nahi izan diogu protagonismo berezia, Ibaizabal Magazinaren edukiak azalaren erdigunean nabarmenduz. Azkenik, erredakzioan eskuz aukeratutako eduki batzuk nabarmendu ditugu “Nabarmenduak” atalean, azken-azken ordukoak ez izan arren, bereziki interesgarriak iritzi diegulako.
Podcastak izan ohi dira gure edukiak, argitalpen gehienetan audioak entzun baitaitezke, baina bakoitzak badu bere testua, irudia eta, askotan, baita bideoak ere. Baina zuzeneko seinale digitala, jarioa edo estrimiña ere eraberritu dugu iragan astean egondako istriputxu bat profitatuta. Aurrerantzean, eta Izarkom telefonia hornitzaile kooperatibaren laguntzari esker, zuzeneko seinalea lehengo lekuan topatuko duzue, baina eraberrituta (AAC formatuan, MP3 baino trinkotuagoa baina kalitate gehiagorekin) eta nabigatzaile guztiekin bateragarria da. Entzun:
