Ez da ohiko erakusketa, eta ez da lehiaketa bat. Ez da soilik esperimentu xelebreen desfile bat, Elhuyar Zientzia Azoka beste zerbait da: gazteen jakin-mina plazara ateratzeko gonbita da, zientzia eta teknologiaren mundua lehen pertsonan bizitzeko aukera paregabea. 150 bat talde, 640 ikasle baino gehiago, Euskal Herriko 60 ikastetxetatik.
Gasteizko Olabide Ikastolako Maialen, June eta Maren izan dira gurean. Janariaren xahuketak sortzen dien kezkatik abiatuta, sagarren oxidazioaren inguruko ikerketa bat egin dute. Horretarako, sagarrak hainbat likidorekin kontaktuan jarri dituzte, eta ikusi dute limoia dela oxidazioa saihesteko eraginkorrena.
Leitzako institutuko hiru ikasle, Aingeru, Adur eta Irati, iritsi dira Elhuyar Zientzia Azokara, Aldatzetik, Atallutik eta Goizuetatik, hurrenez hurren. Batxilergoko ikasleak dira, eta institutuan antibiotikoen eta onddoen arteko harremana ikertu dute, bereziki antibiotikoekiko erresistentzia garatzen duten bakterioei erreparatuta.
Klima aldaketarekiko kezkatik abiatuta, Aixerrota institutuko lau ikasle algortarrek —Mikel, Xabi, Antxon eta Gaizka— ikerketa bat garatu dute, landareek estres egoera ezberdinen aurrean duten bizirauteko gaitasuna aztertzeko. Emaitzen arabera, klima aldaketak eragin handia du landareen erresistentzian.
Santurtziko Kantauri BHIko ikasleak dira Aritz, Mikele, Alba eta Izaro, talde handiago baten ordezkari. Taldeko batzuek bioplastikoaren garapena izan dute ikergai, ingurumenari kalte gutxiago eragiteko helburuarekin. Almidoia izan dute oinarri, eta horretarako arrozarekin, dilistekin, sagarrarekin, yucarekin eta patatekin esperimentatu dute. Azken bi horiekin lortu dute plastikoaren antzeko ezaugarriak dituen material biodegradagarri bat sortzea.
Solokoetxeko institutuko Aimar eta Eneko etorri dira ondoren, sakelakoa kargatzen duen bizikleta estatikoa aurkeztu dute.
Elorriotik etorri dira Jhoselin eta Nahia, plastikozko “birika” batzuk eskuetan daramatzatela. Institutuan egindako inkesten bidez asma aztertu dute, eta ondorioztatu dute asmadunek zailtasunak izaten dituztela kirola egitean.
June eta Izadi Lauaxeta ikastolatik datoz, “Izum” ikerketarekin. Satelite batek emandako datuen bidez, izpi ultramoreek Lurra nola jotzen duten aztertu dituzte, ozono geruza nola dagoen eta Antartidan klima nola aldatu den.
Laudioko institutuko Edurne, Irati eta Maider izan dira gurean, kombucharen inguruan egin duten ikerketa aurkezteko. Asiako jatorria duen tea itxurako edari hartzitu hau oinarri hartuta, plastikoaren antzeko material bat sortzen saiatzen ari dira.
Nahia eta Aimar Galdakaoko Elexalde institututik datoz eta olatu tanke bat sortu dute uhinek sortzen duten energia aztertzeko, behar bezala argindarra bihurtu ahal izanez gero oso-oso erabilgarria izan daitekeela esan digute.
Gorka, Alejandro, Mikel eta Danel Colegio Vizcayako ikasleak dira, eta zigarrokinak lurrera botatzearen ingurumen-inpaktua aztertu dute. Bereziki, nikotinak landareengan duen eragina aztergai izan dute: kolorean aldaketak eragiten ditu eta biziraupenean ere eragin zuzena du. Lau lorontzitan egin dute esperimentua, bakoitzean zigarrokin kopuru ezberdinak erabilita. Azkenean, lorontzi bakarreko landareak baino ez zuen biziraun.
saioa osoa deskargatu hemen.
