Astelehena izaki, ekonomian murgildu gara Jon Bernat Zubiriren eskutik. Gure ekonomialariak zorraz jardun du gaurkoan, publikoaz zein pribatuaz, bataren eta bestearen ezaugarriak zehazki azalduz. Zorpetze publikoak Eurogune deiturikoan sortu dituen arazo itzelak eta arazo horietatik eratorri diren mendekotasun eta morrontza ekonomikoak aipatu ditu berak. Beste herrialde batzuen datuak ere eman dituen arren, Grezia hartu du egoera horren adibidetzat. Horren ostean, zor pribatuaz jardun du, berau hiru mailatan sailkatuz: familien zorra, finantza erakundeena eta bestelako erakunde pribatuena. Irlanda eta Herbehereak dira zor pribatu handiena duten herrialdeak, baina Espainia eta Portugal ere ez dabiltza urrun. Azkenean, Europan benetako oreka sozial eta politikoa nahi badugu, zor publikoaren zein pribatuaren auditoria egin beharko litzatekeela iritzi dio Jon Bernatek, gaur egungo ezberdintasunak areago ez handitzearren.
HIZPIDEA: Zor publikoaz eta zor pribatuaz
