Aupa! Benjamin Biolay-k 2005ean kaleratu zuen A l’origin izeneko diskoa eta hori berreskuratu nahi izan dugu saioari hasiera emateko. Egile frantziar honek ibilbide luzea eta interesgarria dauka. Jarraian Insecure Men taldea. Beste noizbait ere azaldu da gure gonbidatuen artean. Saul Adamczewski-k sortutako proiektua da. Adamczewski Fat White Family taldeko gitarra jolea da, baina taldetik alboratu zuten garai batez bere adikzioak zirela medio. Bitarte horretan Insecure Men proiektu guztiz gomendagarri hau sortu zuen. Irlandara goaz izugarri gustatu zaigun talde bat ezagutzera, beraiek dira Fontaines D.C. eta Dublineko langileen auzoetan sortu da Dogrel izena du euren estraineko diskoak. Lan honetan aspaldiko joera bat agertzen da, alegia, diskoa osotasun bat bezala ulertzearena. Single indartsuak eta lan nekaezina. Mikel Iraetak bisita egiten digu Azkoitiatik kaleratu duen lehenbiziko abestia aurkezteko, abestiaren izen kriptikoa 09121996 da. Iraetak musika elektronika jorratzen du gustu handiz. Segidan Lumi taldea, Nahia Zubeldiak eta Manu Matthysek osatzen dute Lumi elektro-pop bikotea. 2015ean kaleratu zuten disko homonimoarekin ekarri dugu taldea. Eta bukatzeko, hurrenez hurren, Julia Jacklin Australiatik Crushing disko berriarekin eta Bakar, Camdeneko egile eklektikoa. Ondo izan!
Deskargatu hemen.