REAS Euskadien lana hobeto ezagutzeko aukera izan genuen ekainean, izan ere, kontsumo kritiko eta eraldatzailearen eremuan dauden ekimen batzuk ezagutzera emateko, txangoa antolatu zuen ekonomia solidarioaren inguruko elkarte honek, eta guk izena eman genuen bertan.
Hasteko, bertako Zaloa Pérezek azaldu zigun zer den REAS Euskadi. Ondoren, autobusa hartu eta Berziklatu enpresa ezagutu genuen, herrietan jasotzen diren altzari zaharrak jaso eta birziklatzeko txikitzen dituen zentrua. Horren ostean, Bilbora itzuli eta Labore elkartearen egoitzan Labore bera, Fiare eta Goiener ezagutu genituen, elikadura, energia eta banka arloetan gizartea eraldatzeko ikuspegia duten ekimenak eta REASen kideak dira hirurak.
Besteak beste, Felipe Urkidik FIAREren banka etikoa zer den azaldu zigun euskaraz. Reaseko merkatu sozialen arduradun Blanca Boixek azaldu zigunez, REASen lau sektore estrategiko ordezkatzen dituzte ekimen hauek, baina guztira 114 baino gehiago dira REASen merkatu sozialak osatzen dituzten entitateak. Aniztasun horren erakusgarri izango da asteburu honetan, azaroaren 8 eta 9an, Bilbon izango den Euskadiko Ekonomia Sozial eta Solidarioaren (ESS) festa.
Gehigarri moduan, bidean Blancak Ekonomiaren kapitalismoan harrapatuta kontakizuna irakurri zigun, kapitalismo korporatibistaren ekonomiaren aurrean, ekonomia sozial eta solidarioak dituen balioak erakusten dizkigun ipuin laburra, Silvia Nanclaresek Diagonal aldizkarian argitaratutakoan oinarritua.
Deskargatu hemen.
