Ostegunero bezala, Argia astekariaz aritu gara. Bertako Gorka Peñagarikano kazetariak asteon aldizkariak dakartzan hiru gai nabarmendu dizkigu. Lehenik, azalean datorren Maspalomas euskarazko film berria: homosexualitatea eta zahartzaroa lantzen ditu, eta Donostiako Zinemaldian aurkeztuko dute. Bigarrenik, Irati Zubia Landa filosofo gaztea izan dute solaskide. Donostiarra da, eta egia-ostearen eta gezurraren inguruko tesia egiten ari da. Ezaguna da, gainera, Berria egunkarian zutabegilea delako. Azkenik, Onintza Enbeita eta Feli Madariaga izan ditugu hizpide, Muxikako Igertu baserrikoak. ARGIAk eta Bizi Baratzeak udazkenean argitaratuko dute Bizitza baten txatalak liburua. Enbeitak jaso ditu Madariagaren bizipenak, eta bertan baserriaren eta baserri ereduaren inguruko kontuak ageri dira: emakumea eta lurra ardatz.
Deskargatu hemen.
