EHGAM talde sexu-disidenteak Bilboko Udalak eratutako Bilbao Bizkaia Harro-k antolatutako programazio turistikoari boikota egiteko eskatu du , eta E28 Koordinadorak deitutako manifestazioarekin bat egin du. Mobilizazioa ekainaren 28an izango da, 12:00etan La Casillatik abiatuta. E28, LGTBI+ Harrotasunaren Nazioarteko Eguna, 1969ko Stonewalleko matxinadaren harira ospatzen da urtero mundu osoan. Bilbon, lehen aldiz 1978an antolatu zuen EHGAMek, eta ordutik ia 50 urtez bertako kolektiboen esku egon da antolakuntza, E28 Koordinadoraren bidez. Hala ere, EHGAMen arabera, 2015etik aurrera Bilboko Udalak norabidea aldatu du: orduan sortu zuen Bilbao Pride egitasmo turistikoa (gaur egungo Bilbao Bizkaia Harro), eta ekimen horrek, taldearen ustez, “gay zuri eta aberatsarentzat diseinatutako hiri-negozio” bihurtu du egunaren zentzua, “folklore turistiko eta neoliberalaren bidez”.
Deskargatu hemen.
