Pin Pan Pun taldeko lagunak hartu ditu bisitari Anartz Bilbaok aste honetako Gaubasan. Etsaiak taldeko abeslaria izandako Auok Pin Pan Pun Band izeneko esperimentua jarri zuen martxan, rock soinu gogorrak Karibe aldeko doinuekin eta batukadarekin nahastuz. Orain, Band izena galduta, taldea eraberritu eta bere sustraietara itzuli da. Oihuka disketxean Sistema arrakalatu diskoa plazaratu dute. Luze azaldu dituzte Auok berak eta Txus gitarrajoleak beren disko berriaren ezaugarriak, eta zenbait kanta entzuteko parada izan dugu. Bestalde, Gusa Rock jaialdiari ere denbora dezente eskaini dio Anartzek. Jakina denez, Nok taldeko gitarrajolea zen Raul Gallegok istripu larria izan zuen eta haren ondorioz elbarriturik gelditu da. Hori jakinda, makina bat taldetako musikari lagunak berari laguntzeko prest azaldu dira eta zenbait kontzertu antolatu dituzte. Hurrengoa Durangon izango da maiatzaren 12an eta 13an eta bertan SA, Gatibu, Kaotiko, Des-Kontro, Skalariakl eta Bebe kantaria izango dira, besteak beste. Hori dela eta, berorietako batzuen musika berriz entzunarazteko probetxatu du Anartzek. Azkenik, esan behar maiatzaren 13an Bilboko Kafe Antzokian izango den talde handi baten aurkezpena egin digula: The North Mississippi Allstars. Saioa deskargatzeko, klikatu HEMEN.