Azken urteotan maiz, maizegi, entzun dugu krisialdia gainditua dagoela eta ekonomia berehalako batean suspertuko zaigula. Hala ere, ekonomia eta errealitatea egoskorrak dira eta behin eta berriro ezeztatzen dituzte eskuineko politikariek zabaldutako iritziak eta emandako datuak. Eta asko dira, izan, positibismo itsu horren aurka altxatzen diren ahotsak, krisialdi hau, behin behinekoa barik, sistemikoa dela esanez. Ahots horien artean aurkitzen ditugu, konparaziorako, Albert Recio ekonomialari katalanarena eta Joseba Azkarraga soziologo euskaldunarena. Hain zuzen ere, Jon Bernat Zubiri ekonomialariak, haien artikulu batzuetan oinarriturik, kapitalismoaren erroak eta moduak hain nabarmen erakusten dituen krisialdi honen kritika zorrotza egin digu gaurko irratsaioan.
HIZPIDEA: Krisialdi hau ez da hain erraz amaituko
