Erroa argitaletxeak Herrien mintzoa bildumaren barruko liburu berria aurkeztu du Durangoko Azokan: Qissat, Palestinako emakumeen ipuinak. Ahotsenean egindako aurkezpenean, Xabier Monasterio editoreak azaldu duenez, hamasei emakumezko idazle palestinarrek idatzitako beste hainbeste ipuin biltzen dira Qissat-en. “Horietatik 7tan esan dezakegu herri horrek bizi duen gatazka oso agerian islatzen dela, baina beste 9 ipuinetan bestelako kontuak ageri dira: neskak haztearen gorabeherak, maitasunaren plazer eta minak eta beste hainbat gai unibertsal, beti emakumezko begirada argien ikuspuntutik”, zehaztu du liburua euskarara ekarri duen Monasteriok.
Liburua osatzen duten hamasei kontakizunen jatorrizko bilduma Joe Glanville kazetariak egin zuen. Emakume hau English PENeko kidea eta Index on Censorship-eko editorea da. Glanville BBCko editorea izan zen hainbat urtez eta Palestinari buruzko dokumental eta artikulu ugari idatzitakoa da.
Liburuaren hitzaurre mamitsu eta argigarria, berriz, Ane Irazabal kazetariak idatzi du. Berak oso ondo ezagutzen du Palestina eta bertako emakumeen egoera, eta haien “borroka isila” nabarmendu du hitzaurrean. Berak ezin izan zuen aurkezpenera etorri, baina Italiatik bideo labur hau igorri zigun, liburua gomendatuz.
