Bilbo ezagutzeko asmoz, pasieran atera ohi gara atal honetan. Badakigu gaur ikusten dugun Bilbo ez dela beti berdina izan; aitzitik, Erdi Arotik aldatu egin da, hirian bizi garen pertsonon ekintzak hiria bera eraldatu dutelako. Kaleak, kantoiak eta harresiaren hondarrak… gure gonbidatuen begietatik ikusteko gonbida duzu Bilbo pasieran saioa. Gaurkoan Alemaniatik etorritako Klaus eta Andrea izan ditugu bidelagun. Done Bikendi kalean egin dugu lehen geldialdia, izan ere, Bilbora duela hogei urte etorri ziren eta euskara ikasi zuten lekuan abiatu dugu ibilbidea, Gabriel Aresti euskaltegian. Ondoren Zazpi Kaleetako bihotzera joan gara, Unamuno edo Etxebarrieta anaien plazara. Bertan bizi izan ziren urte askotan, eta auzoaren eraldaketaren inguruko hausnarketak konpartitu ditugu beraiekin. Ibilbidea Arriaga plaza atzealdean jarraitu dugu eta, bertan, Aste Nagusia izan dute gogoan.
Deskargatu hemen.