Irakurzaletasuna eta euskararen erabilera bultzatzea du helburu Elkar Fundazioak deitutako Ilustrazio eta Ipuin Lehiaketaren 15. edizioak. Lanak aurkezteko epea apirilaren 20ra arte egongo da zabalik. Borja Goitia solastatu da gurekin eta lehiaketaren xehetasunak ekarri dizkigu. Ipuin ilustratu, ilustrazioa ipuin bilakatu eta komikia edo bineta sortu beharko dute parte hartzaileek. Esti Vivancok idatzitako Nora joan da Nora? ipuina irakurri eta ilustratu beharko dute txikienek (Haur Hezkuntza 4tik Lehen Hezkuntza 4ra). Koxkorragoek (Lehen Hezkuntza 5etik Derrigorrezko Bigarren Hezkuntza 2ra), berriz, Alex Orbek sortutako ilustrazioan oinarritu beharko dute beraiek sortutako ipuina. Azkenik, DBH 3 eta DBH 4 mailetako gazteek bi aukera izango dituzte: Alex Orbek hasitako komikiari jarraipena ematea edota beronen gaia mantenduz (txango bat) komikia hasieratik sortzea.
Deskargatu hemen.
