Black Country, New Road taldeak irekiko du gaurko ordua, Londonetik datorren talde bitxia dugu, proposamen heldua eta aberatsa eskaintzen dute. For the First Time da euren estreinako diskoa. Hurrengo taldea Galdakao aldetik dator eta euren lehenbiziko diskoarekin datoz. Kaserna dute izena eta Mr Pongo proiektuaren errautsetatik jaiotako banda berria da. Formazio berriak hip-hop eta funk-etik gertuko erritmoak jorratzen dituzte, dotore eta indartsu, rock oinarri nabariarekin. Diskoaren izena: Gelditu da Denbora. Segidan sentsibilitate handia duen banda batekin goaz. Physis versus Nomos taldearen proposamenak entzule abilak eskatzen ditu, euren musika isurtzen da trabarik gabe, nostalgia puntu bat eta amorru ezkutua. Arraro Nioenean da euren azken diskoa. Hurrengo gonbidatua Kaliforniatik dator. Madlib izenaren atzean multiinstrumentista bat dugu, Otis Jackson. Soinuekin jolasean, erritmo apurtu eta zikinak, funk, soul, hip-hop… Soinu asko nahasten dira bere musikan. Sound Ancestors da bere azken proposamena. PVA musika dantzagarria jorratzen dute dotorezia handiaz, beste hainbat estiloen oihartzuna sumatzen da euren proposamenean. Toner izenarekin kaleratu du azken diskoa Londoneko taldeak. Eta bukatzeko, Arlo Parks-en Collapsed in Sunbeams diskotik ateratako abesti bat.
Deskargatu hemen.
