Soul izpiritua eta doinu beltzak txirikordatzen dituzten abestiak ekarri ditu BELE proiektuak. Lide Hernandok (Liher) aurkeztuko dizkigu orain arte atera dituen hiru singleak. Gerora etorriko da diskoa. Gaurko protagonista beraz, BELE. Hurrengo gonbidatua saio honetako aspaldiko ezaguna da. Damien Jurado. Bere azken diskoa, Motorcycle Madness, oso bitxia da. Grabazioa zuzenean egindako lana ematen du, baina diskora ekartzean lo-fi bortitz bat hautatu du Juradok. Oso bitxia. Aurrera. Elorri Lambert-ek urte honetan disko eder bat kaleratu du, gitarra eta ahots soilez, Irulegiko abeslaria beste proiektu batzuetan egon da aurretik eta orain bakarkako bideari ekin dio. Elementu gutxirekin emaitza oso interesgarria lortu du. Beste proiektu bitxi bat hurrena. Zauria izena jarri diote euren buruari eta izen bereko diskoarekin datoz Bidehutsen eskutik. Bikote honek proposamen heldua ekartzen dute, merkatuaren printzipio guztietatik at. Eta esperimentazioaren alorrean jarraituko dugu hurrengo minutuetan ere. Rrucculla Izaskun Gonzalez musikari eta bateria jotzailearen proiektua da. Musika elektronikoa lantzen du, genero desberdinetako oihartzunak bere eginez eta esperimentazio ukitu nabarmenarekin. Zeru Freq. izena jarri dio kaleratu berri duen diskoari. Eta bukatzeko rock & roll ondo egina. Elortegi Anayak izenpean Basque Culinary Rockandroll izeneko diskoa kaleratu dute eta bertan tituluak agintzen duen bezala, rock freskoa eta zuzpergarria.
Deskargatu hemen.
