Uda iritsi da, eta horrekin batera barnetegiek berriz ere ateak zabaldu dituzte. Gabriel Aresti euskaltegiak Bakaikuko barnetegiaz gain, Bilbon ere antolatu du aurten barnetegia. Batzuek huts-hutsean hasten dute bidea; beste batzuek, berriz, erabilera indartu nahi dute. Baina denek dute helburu komun bat: euskara ikastea, eta, batez ere, euskaraz bizitzea. Barnetegia ez da ohiko ikastaro bat. Ez da soilik gramatika eta hiztegia, ez da soilik klasea eta fitxak. Barnetegian bestelako ekintzak ere egiten dira. Gaur, Bilboko barnetegiko ikasle batzuk gurekin ditugu, eta haien ahotsen bidez jakin dugu zer-nolako esperientzia izaten ari diren. Zerk motibatu ditu? Zer aurkitu dute hemen? Zerk harritu ditu? Eta batez ere, nola ari dira bizitzen euskaraz bizitzeko aukera hau?
