Gaurkoan, Korrika Kulturalak dakarren estreinaldi bitxi, ausart eta dibertigarrietako baten atarira hurbilduko gara: Kaka antzezlana. Bai, ondo entzun duzue: kaka. Mendeak dira munduan mokordorik ez dagoela —gizakiek ipurdia izanda ere, ipurtzuloa falta omen zaie—, baina bat-batean, Ipurtegietako plazan kaka mokordo bat agertu da. Misterioa, deserosotasuna eta barrea nahasten dituen egoera zoroa. Erika Olaizolak eta Xanti Agirrezabalak sortu dute istorio hau, eta AEK-Korrikaren II. Kultur Sorkuntza Beka irabazi ondoren oholtzara eramango dute asteazkenean, Donostiako Antzoki Zaharrean. Haiekin batera ariko dira Ainhoa Aierbe eta Mikel Laskurain ere, herriko alkate, antropologo, ertzain eta laguntzaile bitxien arteko kaos gozagarria sortuz. Gaur, gurekin dugu Xatin, Xanti Agirrezabal bera, proiektu honen sortzaileetako bat. Jolasetik abiatutako ideia zoro batek nola bihurtzen duen antzezlan oso bat, zer dioten kakarik gabeko gizarteek… eta nola egiten den umorea tabuarekin jolastuz, hori guztia kontatuko digu.
Deskargatu hemen.