Lehenengo minutuak Oso Oso taldearekin igaroko ditugu gaurko saioan. New Yorketik datorren rock talde honek Basking in the Glow diskoa kaleratu berri dute. Bandaren hirugarren diskoa da. Ondoren Londresera joango gara, talde baten lehen disko luzea entzutera. Interes handia sortu duen banda dugu Black Midi. Orain arte, han-hemen argitaratu ditu abesti solteak. Orain disko luzearen garaia da. Schlagenheim. Guri gustatzen zaigu. Berriz erori gara Brittany Howard-en sarean, bere bakarkako estraineko diskoa disfrutatzen ari gara: Jaime. Alabamako musikari honen ahotsak indar berezia dauka. Segidan beste emakume bat, Connie Constance. Aurten lehenengo diskoa kaleratu duen arren, heldutasuna dario bere musikari. Diskoaren izena English Rose. Eta disko horren tituluak gogora ekarri digu Londreseko beste artista bat, aspaldi entzun ez duguna: Pete Doherty (The Libertines), bere bakarkako lehen diskoan Last of the English Roses abestia agertzen zelako. Beraz, burutazioa aprobetxatu dugu lekutxo bat egiteko duela hamar urte kaleratu zuen diskoa entzuteko (Grace Wastelands, 2009). Duela zenbait urte argitaratu zuten Nahia Zubeldiak (ahotsa eta gitarra elektrikoa) eta Manu Matthysek (elektronika) Lumi izeneko disko homonimoa. Lumik elektro-pop dotorea jorratzen dute, psikodelia puntu batekin. Batzutan Espers taldea ekartzen digute gogora, eta aitzakia erabilita, gaurko saioa Espers taldearekin bukatuko dugu.
Deskargatu hemen.
