Gaurko saioari hasiera emateko Albin Lee Meldau gonbidatu dugu. Suediar honek bere jaioterriko topikoekin hausten du, hala nola, Suediako jendea hotza dela. About You diskoan erakusten du ez dela horrela, soul beltza zuri errubio batek abestua. Diskoan perla batzuk biltzen ditu hala nola Lou Lou izeneko abestia (berea den bakarra) baina baditu momentu ahulak ere. Hurrengo txanda King Krule-ri dagokio. Saio honetan musikari britaniar honen zale porrokatuak gara. Bi abesti ikoniko entzungo ditugu The OOZ diskotik aterata: Biscuit Town eta Dum Surfer. Segidan Blood Orange, Devonté Hynes musikariaren oskola. Blood Orange izenpean lau disko luze kaleratu ditu, azkena Negro Swan 2018an. Bertan konplexurik gabe agertzen da Prince-n musikariaren oinordea izango bailitzan. Disko barnerakoi honekin hiriaren hatsa kokotean sentiarazten digu. Big Thief taldeak disko berria kaleratu du, U.F.O.F du izena, eta abesti sorta ederra bildu dute bertan Brooklyngoek. Bertati bi abesti hauskor. Anarik banda sendoa sortu du urte hauetan eta hori ikusten da bere azken diskoetan, musikarien arteko konplizidade horrek ondo etorri zaizkio Anariren abesti emozionalei. Zure Aurrekari Penalak diskoa ekarri dugu gaur horren adibide. Hurrengoa zerrendan Ezra Furman. Ipar amerikar honek Transangelic Exodus diskoa kaleratu zuen 2018an. Diskoak istorio bitxi bat aletzen du abestiz abesti. Eta bukatzeko Hannot Mintegiaren Moxal proiektua. Disko aztoragarria eta misteriotsua bezain atsegina.
Deskargatu hemen.
