Bilbo zaharreko bihotzean kokatuta dagoen Sehaska etxea Ricardo Bastida arkitektoak proiektatu eta eraiki zuen 1914an , eta geroago, 1939an, eraberritu egin zuen. Diru publikoz egindako eraikin historiko hau auzoko emakume langileen beharrei erantzuteko eraiki zen, lanera zihoazenean haurrak uzteko tokia behar baitzuten. Nolabait esateko, langile klasearen beharrei erantzuteko eta hauen bizi-baldintzak hobetzeko sortutako eraikina izan da betidanik Sehaska etxea.
2018an, haurtzaindegia itxi zutenean, BBK Fundazioak eta udalak parte hartzeko bide bat irekitzeko konpromisoa hartu zuten, eta gune horren etorkizuneko erabilerari buruzko proposamenak jasotzeko ideia-lehiaketa bat antolatu zuten.
Orduan, auzotar guztiek pentsatze zuten eraikinak auzoko kolektibo pobreen beharrei erantzun behar ziela, hau da, gizarte-kohesioa sustatu eta komunitatea egin behar zela, belaunaldien artean elkar zaintzeko, elkartasunerako guneak sortzeko eta justizia soziala bultzatzeko. Auzoko bizilagunek honako ideiak hauek proposatu zituzten BBK Fundazioak eta udalak zabaldutako lehiaketara: bakardade-egoeran dauden adinekoak elkartzeko gune bat, emakumeen etxea, ikasle eta langabetuentzako prestakuntza gune bat, eta memoria historikoa ez galtzeko espazio bat, auzoko meatzaritzaren industria gogorarazteko.
Auzo asanbladako kide batek dioenez, ideia-lehiaketa hori bere horretan geratu zen eta auzotarrek ez zuten ezer gehiago jakin.
Deskargatu hemen.