Diskotegi zaharrean zirikatzen, Immaculate Fools taldearen lehenengo diskoa topatu dugu: Hearts of Fortune. Taldea jada desagertu den arren hona ekarriko dugu euren musika. Ingelesak izan arren Ingalaterratik kanpo eduki zuten arrakastarik gehien. Egun, taldeko buru zen Kevin Weatherill Galizian bizi da eta bertan jarraitzen du musika grabatzen. Hurrengo taldeak Hypoluxo du izena eta post-punk ukituak dituen musika zuzena egiten dute. Hau da euren azken diskoa eta, bitxia bada ere (hirugarren diskoa delako), taldearen izen bera darama. Hurrengo taldearen musika jazz eta pop musikaren artean mugitzen da, emaitza berezia da zinez. Badge Époque Ensemble dute izena eta euren azken grabazioa da Self Help. Australiara goaz hurrengo artistaren musika ekartzera. Kim Salmon musikaria saltsa askotan sartuta dagoen musikaria da, oraingoan Kim Salmon & The Business formatoan dator The Record Singles grabazioarekin. Hurrengo gonbidatua U.S. Girls taldea da. Meghan Remy Torontoko artista dago izen horren atzean, eta 2018koa da gaur ekarri dugun bere azken aurreko diskoa. Bidaia ugari proposatzen dituen diskoa da, poliedrikoa. In a Poem Unlimited. Kanadan jarraituko dugu hurrengo bandarekin. Nap Eyes. 2011an sortu zen taldea eta gaur ekarri dugun diskoa, I’m Bad Now, 2018an kaleratu zuten. Eta bukatzeko Mikel Urdangarin eta bere azken diskoa Izurdeen lekua. Disko honetako abestiak pianoa erabilita konposatu ditu Urdangarinek lehenengo aldiz. Horra hor emaitza.
Deskargatu hemen.