1976ko Martxoaren 3ko sarraskiak 50 urte betetzen ditu gaur, eta oroimena eta borrokan jarraitzeko konpromisoari eskaini diogu gaurko Lanaren Ekonomia irratsaioa. Jarraipen zabala egin dute Hordagok eta Argiak, bost hildako eta ehunka zaurituen ohiko oroigarrietatik haratago joateko. Azken horiek eta haien familiak gogoratzea ezinbestekoa dugu eta, aldi berean, ez da nahikoa langile greba haren kausak eta oinarri asanblearioak adierazteko, eta frankismoak ohi zuen bezala indarkeriaz desagerrarazi nahi izan zuen klase autonomia erradikala azpimarratzeko ere. Horregatik, agenda sindikalarekin hasi eta gero, Bego Oleaga elkarrizketatuko dugu, M3ko militante historikoa. Ostean Pablo Oliveros editorearekin Hordagok egindako jarraipena aztertu dugu. Bukatzeko, Argia atalean, Urko Apaolazagaz berba egindugu, astekariak M3ari buruz dakarrena aztertzeko. Lanaren Ekonomia Bilbo Hiria irratian egiten dugun elkarlana da, beti Ibon Burgoa teknikaria eta Ane Zabala ekoizleari esker, eta Bilbo Hiria, Hordago, El Salto Radio, Argia eta Arrosa sarean artekoa da. Langileen ikuspegitik egindako ekonomiaren analisia da gurea, eta bai, langile borroka auzi ekonomikoa da ere, ezinbestekoa dena munduaren bilakaera ulertzeko. Hortik, martxoaren 3ko memoria, justizia eta gaurkotasuna aldarrikatzen dugu, gure ekarpen xumea eginez.
Deskargatu hemen.
