Mungiako TOC taldearen azken grabazioak kateatuta gauzka. Punk rock iluna, freskoa, ongi egina. Zidazun du izena grabazio horrek eta bertara sartzen bazarete egonaldi luze eta oparoa egingo duzue horko abestietan barrena. Guztiz gomendagarria. Kanadara goaz hurrengo taldearen bila. Egia esan azken bolada honetan Kanadatik oso musika interesgarria heltzen ari da. Kasu honetan Tamara Lindeman-ek zuzentzen duen The Weather Station taldea ekarri dugu euren azken grabazioarekin: Ignorance. Belusezko soinuak. Erritmo eta kadentzia gozagarriak dakartza hurrengo taldeak: Badge Epoque Ensemble. Self Help du izena azken lanak eta sailkatzeko zaila den arren, esan dezagun jazz, soul eta pop soinuek bat egiten dutela euren proposamenean.
Melbournetik dator Sarah Mary Chadwick. Pianoaren laguntza soilarekin bere ahotsa eta testuak loratzen dira gordin. Me and Ennui are Friends, Baby izena duen bere azken diskoan indar berezi bat sumatzen da. Disko hunkigarria. Arlo Parks doa hurrengoa. Azken bolada honetako disko kutunetako bat da Collapsed in Sunbeams, soul soinuak kadentzia atseginak. Grises taldeko Eñaut Gaztañagaren beste proiektu batekin goaz orain. Zestoan jaio da Ezpalak taldea eta aurki kaleratuko dute euren azken (bigarren) disko luzea. Bitartean taldeak kaleratutako bi abestirekin konformatu behar. Indarra. Bukatzeko Jarvis Cocker, orain Jarv Is izenez agertu da Beyond the Pale grabazio zoragarrian.
Deskargatu hemen.