Astero legez, aste honetako ARGIA astekariak asteon zer eduki daukan, zer albiste eta elkarrizketa dakarren jakin nahi izan dugu eta horretarako bertako kazetaria den Lander Arbelaitzengana jo dugu. Eduki guztietatik hiru azpimarratu ditu Bilbo Hiriaren ohiko kolaboratzaileak. Lehen-lehenik, aste honetako gai zentrala osatzen duen erreportajea jorratu du, “Gure eguneroko pozoiak“, alegia. Ohartzen ez bagara ere, gure gorputzak era guztietako kanpo eragile artifizialen eraso etengabeak jasotzen ditu, epe luze bati begira benetan arriskutsu gerta daitezkeenak. Sail horretakoak dirateke pestizidak, xaboiak, kosmetikoak, plastikoak eta beste hainbat produktu, adituen ustez, behar besteko kontrolik ez dutenak. Horren ostean, Los chicos del Maiz rap taldearen abeslariari eginiko elkarrizketa interesgarria aurkeztu digu Landerrek. Beren konpromiso politikoa berresteaz gainera, rap esparruan sumatzen duten makaltasun ideologikoa kritikatu du musikariak. Azkenik, Kurdistango HDP alderditik parlamentari den Sadet Decerikli emakumezko kurduari eginiko elkarrizketa sakona irakurtzea gomendatu digu Landerrek, Kurdistango egoera politiko korapilatsua hobeto ulertzen lagun diezagukeelakoan.
Honekin lotuak
-
2015/12/14
HIZPIDEA: Arrosa Sareko webgune berria